VIGAN CITY – Naragsak ni Kylie Soberano iti pannakakoronana kas Ilocos Sur LGBT Festival Queen 2024 kagiddan ti panagrambak iti Ilocos Sur Festival.
Iti pannaki-uman ti Bombo Radyo Vigan ken ni Soberano a nangibagi iti ili ti Cabugao, nupay nabannog ket napalaus iti ragsakna ta nasukatan ti bannogh ken sakripisyona.
Segun ken ni Soberano, saan a nagari kenkuana iti danag bayat ti question and answer nu diketdi sinaganaanna iti pageant ta adu a panagadal iti inaramidna tapno makasungbat aniaman a saludsod iti maibatog kenkuana.
Bigbigenna iti kinalaing dagiti padana a kandidata ta ammona a kas kenkuana ket nagsagana met laeng ken nangnamnama a magun-odda iti korona isu a saludo amin kadakuada a nangibagi kadagiti nagtaudanda nga ili ken siudad.
Imbingayna nga adun iti nangabakanna a pageant ngem awanen ti naragragsak pay iti mangabak iti bukod a probinsia isu nga ipanakkelna iti bagina.
Kas panangitultuloy iti naragpatna ket ipaganetgetna babaen ti adbokasiyana iti panangipangruna kadagiti ubbing ket agpokus iti panangsalwad iti aglawlaw tapno agbalinda a best contributor iti kagimungan.
Kabayatanna, balakadna kadagiti agtutubo a rumbeng laeng a surotenda iti pusoda, amwen ti identity, agbalin a napakumbaba, ken makipagtrabaho iti sabali a tao.
VIDEO – ILOCOS SUR LGBT QUEEN KYLIE SOBERANO
