VIGAN CITY – Maysa kadagiti tallo nga assault rifle a naala dagiti otoridad iti uneg ti campaign vehicle a naabandona kalpasan iti engkuwentro a napasamak iti nagbaetan ti mayoralty candidate ken ABC President idiay Tayum, Abra idi April 23 ket kukua ni incumbent Lagayan, Abra mayor Jendricks Seares Luna a kanakan ni congressional candidate Vicky Seares –Corpus.
Maibasar iti report ti Firearms and Explosive Office ti PNP idiay Camp Crame idi April 29, nakumpirmaran a ti caliber 5.56 Nveske rifle a nag-expire iti lisensya na idi January 14, 2011 ket nakarehistro iti nagan ni Mayor Luna.
Maipalagip a sinukimat dagiti otoridad iti uneg ti naabandona a pick up truck nga inusar da Tayum mayoralty candidate Jose Mari Brillantes ken ti grupo na idi April 23 babaen ti search warrant nga inparuwar ni Regional Trial Court Branc 22 actinge Executive Judge Gina Juan Chan ti Narvacan, Ilocos Sur, makalawas kalpasan iti napasamak nga engkuwentro.
Malaksid iti assault rifle a kukua ni Mayor Luna, naala pay iti uneg ti naabandona a pick up truck iti dua a M4 assault rifles, maysa a M16 assault rifle, dua a Para Ordnance 45 caliber pistol ken maysa a STI edge 45 caliber pistol, pakairamanan dagiti ginasut a bala.
Naamuan pay a ti nasao a lugan a naaramat ket kukua iti maysa nga opisyal ti LGU-Lagayan.
Gapu ti dayta, malaksid ken ni Tayum mayoralty candidate Brillantes a nakasagana a kemmegan dagiti otoridad nu maiparuwar ti arrest warrant kontra kenkuana inaig iti nasao a pasamak ken ti gandat na a panangpatay iti dua a barangay official ket posible a kemmegen to met dagiti otoridad ni Mayor Luna ta pagpalawagen da nu apay nga adda kada Brillantes ti paltog na a nagespire ti lisensya na.
