VIGAN CITY – Mapatta-patta a PHP 50,000 iti gatad iti nauram a sanikua idiay Sitio Riverside, Barangay Poblacion, Sta. Catalina idi September 18.
Dayta iti pinasingkedan ni Sta. Catalina Fire Station head Senior Fire Officer 3 Roselito Riupta iti pannaki-uman kenkuana ti Bombo Radyo Vigan.
Maibasar iti imbestigasyon da Riupta, dagiti nausar nga electric wire ken extension cord iti pagtaengan ni Eugene Rapisura ket substandard isu a nalaka a nagoverload nangruna ket nabay-bay-an a nakasaksak ti dua nga electric fan ken maysa a TV.
Pinasingkedan ti hepe ti Sta. Catalina BFP a maki-us-usar da Rapisura iti kuryente iti karruba da agsipud ta saan da pay a nakapaikabit iti bukod da a linya iti kuryente isu nga agus-usar da kadagiti extension cord.
Nagpaot ti dua pulo a minutos sakbay a naideklerar a fire out iti nakapasamakan iti uram ta insigida a nakapagresponde dagiti bumbero agsipud ta asideg met laeng iti nauram a pagtaengan iti mismo fire station ti ili.
Awan a pulos iti naisalakan nga alikamen iti nauraman a pamilya ngem pagsayaatan na laeng ta awan iti nadangran kadagiti agnanaed iti pagtaengan.
