VIGAN CITY – Nangiyetnag ti Executive Order ni Ilocos Sur Governor Ryan Singson a suroten dagiti returning resident, locally stranded individual ken ROF a kayatna ti agawid tapno makadua ti pamiliada ita a Christmas season.
Ti panagbiahe dagiti ROF, RR ken LSI ket kasapulan a maipakaammo kadagiti Local Government Unit nga ayanda ken kasapulan ti Certificate of Acceptance nga aggapu iti barangay captain nga isu ti maiparang iti border sakbay a makastrekda ditoy probinsia.
Malaksid ti dayta, kasapulan ti negatibo a resulta iti RT PCR test a dimmalananda iti las ud ti tallo nga aldaw wenno antigen test.
Saanen a kasapulan ti facility quarantine kadagiti RR, LSI ken ROF ngem rumbeng nga agtalinaedda iti uneg ti pagtaenganda iti dua a lawas wenno sangapulo ket uppat nga aldaw.
Kas paset ti facility quarantine requirement, masapul a dumalanda iti antigen test no adda uppat nga aldaw a panagtalinaedda ditoy probinsia ken madoblento manen iti maikawalo ken maikasangapulo ket dua sakbay a mabalindanton ti rumuar.
Dagiti RR, LSI ken ROF a nakastrek iti probinsia ngem saan a dimmalan iti antigen test iti maikapat, maikawalo ken maikasangapulo ket dua nga aldaw a panagtalinaedda ket masapul a ma-isolate da kadagiti quarantine facility.
Kabayatanna, dagiti 0-3 years old ket saanen a masapul pay a dumalan iti antigen test idinto a tunggal LGU ket maseknan a mangbantay kadagiti LSI, ROF ken RR pakairamanan dagiti kabbalayda.
Epektibo ti nasao a pagannurotan inton December 7 agingga January 10 inton sumaruno a tawen.
