Nadiskubre dagiti dua a mangngalap iti maysa a pakete wenno maysa kilo a mapapati a shabu nga aggatad iti P6,800,000 iti kabaybayan a sakup idiay Barangay Pinipin, Sta. Cruz, Ilocos Sur idi kalman, June 10, 2025.
Dagiti mangngalap ket da Ridel Cabalbag Callejo, agtawen iti tallopulo ket walo, addaan ti live-in partner; ken Ludivico Cabalbag Ruiz, agtawen iti innem a pulo ket lima nga agpada nga agnaed idiay Barangay Pinipin, Sta. Cruz.
Nasarakan dagiti shabu a tumtumpaw iti kabaybayan a 15 nautical miles iti kaadayo manipod shoreline bayat ti panagkalap dagiti mangngalap a nakalugan iti motorized bangka.
Ti nasao a pakete ket addaan iti babassit a shells a maawagan a Gabilan a nakaipan iti uneg ken ruar ti packaging ken awan iti aniaman a markings-na.
Inturn over dagiti mangngalap iti nasarakanda kadagiti pannakabagi ti linteg iti Sta. Cruz Municipal Police Station.
