Natakaw ti nasurok P20,000 a naglakwan ti maysa a botika idiay Barangay Tablac, Candon City, Ilocos Sur.
Ti biktima ket ti maysa a babai a pharmacy assistant nga agtawen iti limapulo ket pito, taga-Barangay Salvador Primero, Candon City.
Ti met suspek ket ti babai nga agtawen iti uppat a pulo, taga-Barangay San Pablo, San Esteban.
Nagreport ti biktima iti Candon City Police Station a ti suspek ket innalana ti naglakwanda a P29,000 manipud iti blue wallet a naikabil iti brown bag a kukua ti biktima.
Maibasar iti imbestigasion, nagideliver ti suspek iti padas iti nasao a botika ket napalubosan daytoy a sumrek iti uneg a mangawat iti bayad.
Iti dayta a gundaway, imparabaw ti biktima ti bag-na iti lamisaan nga asideg iti suspek a nakaikabilan ti blue wallet a naglaon iti P46,000.
Gimmatang ti suspek iti danum agingga nga adda manen customer isu a linakwan ti biktima ket kalpasanna, naduktalanen a mapukpukaw ti nasao a gatad iti wallet-na.
Maysa met a witness ti nangpasingked a nakitana ti suspek a nangala iti sag-sasangaribo manipud iti wallet ngem impagarupna a kukua daytoy ti suspek.
Naamirisna laengen a kukua ti biktima ti wallet idi nagpatulong kalpasan a natakawan.
