VIGAN CITY – Datin a drug user, surrenderer, ken nagturpos iti community based rehabilitation program iti ili ti Sto. Domingo ti lalaki a nakemmeg iti naiwayat a search warrant gapu iti panaglabsingna iti RA 9165 idiay Brgy. Lussoc.
Iti pannaki-uman ti Bombo Radyo Vigan ken ni IA III Anabel Cabarles, Provincial Officer iti Philippine Drug Enforcement-Ilocos Sur, walo a piraso iti heat sealed transparent iti mapapati a shabu nga agdagsen nasurok kumurang tallo a gramo nga aggatad iti 24,500 a pisos iti naala ti suspek a nabigbig a ni Micheal Tabur Rosabia, agtawen ti uppat a pulo, naasawaan, high value individual, Top 1 Priority target iti provincial level nga agnaed iti nasao a lugar.
Segun ken ni Cabarles, idi kallabes ket namonitor nga agilaklako ti suspek isu a posible nga ilakona koma dagiti naala kenkuana a kontrabando.
Gapu iti dayta ket immapela iti publiko kangrunaan kadagiti agar-aramat ken agilaklako iti maiparit nga agas nga isardengdan iti araramidenda ta patienna a madanonto iti pannakakemmegda.
