Idurduron ti House of Representatives nga usaren ti binilyon a kita manipud iti Malampaya Deep Water Gas-to-Power Project para iti panagpatakder dagiti strategic fuel reserves.
Daytoy ket tapno maprotektaran ti pagilian kontra iti panagbaliw-baliw ti presio ti langis ken kellaat a kinakurang iti suplay.
Segun ken ni House Minority Leader Marcelino Libanan, masapul a gundawayan ti gobierno iti nakolekta a royalties manipud iti proyekto tapno pondoan ti panangipatakder ti coastal petroleum storage facilities iti salinong ti Philippine National Oil Company (PNOC).
Segun iti Budget of Expenditures and Sources of Financing (BESF), umabot iti P200 bilyon ti nakolekta a pondo ti gobierno manipud iti Malampaya manipud tawen 2014 agingga 2024.
Daytoy ket katukad ti P18.2 bilyon nga average a kita kada tawen.
