P1.12 million ti mapatta-patta a gatad ti nadadael gapu iti pannakauram dagiti dua a pagtaengan iti Barangay VII, Salcedo Street, Vigan City, Ilocos Sur.
Dagiti biktima ket da Rizaldy Reosia Urgano, agtawen iti innem a pulo ket uppat ken ni Arnel Mata Autris, agtawen iti limapulo ket lima, agpada nga agnaed iti nasao a lugar.
Iti pannaki-uman ti Bombo Radyo Vigan ken ni SFO2 Rommel Amano, Investigator iti BFP-Vigan, 1 million pesos ti mapatta-patta a gatad dagiti nauram manipud iti pagtaengan ni Urgano idinto a P123,000 ken ni Autris.
Iti inisyal nga imbestigasyonda, alas tres iti malem ket nagluto iti dalikan ni Autris ket ti posible a saanna a pannakadepdep iti naglutwanna ti maysa kadagiti kitkitaenda a rason ti napasamak nga uram.
Napaspas a nagkayamkam ti uram kadagiti kaasidegna a pagtaengan ta naaramid laeng iti light materials ti pagtaengan ni Autris.
Binalakadan ni Amano dagiti agindeg a no adda uram iti lugarda ket itawagda a dagus kadagiti maseknan ken saan nga ag-live pay nga umuna iti social media.
Kabayatanna, impasigurado ni Barangay Kagawad Romeo Artajos a nakapanaw a dagus dagiti bumalay idi mauram dagiti pagtaengan ken nagtitinnulong dagiti agindeg bayat a mayur-uray dagiti bumbero a mangdepdep.
Segun ken met ni Autris, nairaman a nadadael dagiti gudson, electric fan ken dadduma pay nga appliances na.
Gapu dayta, nagkiddaw iti tulong para iti pannakatarimaan ti pagtaenganna ken kadagiti nadadael nga alikamenna.
