--Ads--

VIGAN CITY – Inlawlawag ni Family Welfare Officer ti Overseas Worker Welfare Administration- Region I Myrna Agbayani dagiti rumbeng a maaramid no adda matay nga Overseas Filipino Worker.

Dayta ket kasaruno iti napasamak ken ni Maribel Patubo a taga- Quimmarayan, Bantay a pimmusay idiay Saudi Arabia kalpasan iti pannaka-opera na gapu iti sakit a brain aneurysm.

Segun kenni Agbayani, no adda matay nga OFW, mapan laeng iti pamilia da ti opisina ti department of Foreign Affairs idiay San Fernando City, La Union ket alaenda amin a mabalin a pammaneknek a kabagyanda iti natay nga OFW.

No iti benepisyo iti mapagpapatangan, masapul a ti OFW ket aktibo a miembro ti OWWA ta no kaspangarigan a matay gapu iti sakit ket makaawat ti sangagasut a ribo a pisos, sabali laeng ti dua pulo a ribo a pisos para ti pannakaitabonna; sangapulo ket lima a ribo a pisos ti livelihood assistance a maited ti asawana, ken educational assistance para iti inunaan nga anak na agingga a makapagturpos iti kolehiyo.

Nu ti OFW met ket natay gapu iti aksidente, makaawat iti pamilya na ti dua gasut a ribo a pisos, sabali laeng ti dua pulo ribo a pisos a burial assistance, sangapulo ket lima a ribo a pisos ti livelihood assistance ti asawana ken educational assistance para ti inunaan nga anakna agingga nga agturpos iti kolehiyo.

Inlawlawag na pay a ti programa ti OWWA a rebate program ket iti pannakaited ti incentives para kadagiti sangapulo a tawenen a miyembro ti OWWA ken saan pay a pulos a nakaaw-awat iti aniyaman nga assistance iti ahensya.

Masapul laeng a ti minimum a nabayadan ti OFW nga OWWA contribution ket lima a panagbayadan ken sakbay a mapan da iti opisina ti OWWA, agpa-appointment da iti official website ket agpili da iti aldaw a papan da panangilakad kadagiti kasapulan a papeles tapnu mabenepisyaran da ti rebate program ket mangala da ti ID da.

Kabayatanna, inkari ni Agbayani a tumulong da iti pamilya ni Patubo, nangruna iti pannakaiyawid iti bangkay na manipud Saudi Arabia.

RELATED ARTICLESMORE FROM AUTHOR