Pinasingkedan ti maysa nga agindeg idiay Bangladesh a nakarkaro ti measles outbreak idiay Bangladesh idi Marso agingga Hulyo, ta umabot iti mapatta-patta a 500 nga ubbing ti matmatay iti uneg laeng ti 24 nga oras.
Iti pannaki-uman ti Bombo Radyo Vigan ken ni Bombo International News Correspondent Fatima Jalal, nangrugin a maipaayan iti bakuna dagiti ubbing idi Hunyo kas panangparmek iti outbreak.
Idi kakaro ti outbreak ket napunno dagiti ospital ken awanen dagiti bakante a katre isu a mapilitan dagiti dadduma a pasyente nga agidda iti datar.
Nupay kasta, kunana a bimmassit itan dagiti payente no ikumpara idi kakaro ti outbreak.
Mapapati a ti panagadu ti kaso ket gapu iti matutudo a panawen a mapasarunwan iti bigla a nabara a paniempo.
Ad-adda met a maap-apektaran iti measles dagiti lugar nga overpopulated.
Kabayatanna, nabalakadan dagiti agindeg nga uminom ti filtered water nga isu pay ti danum nga ipapaay ti gobierno.
