Nagballaag ti Office of the Ombudsman kadagiti kameng ti gobierno kontra iti panagaramat iti government fuel para kadagiti pribado a lugan, nangruna ita nga agtultuloy a nangina ti presio ti langis.
Segun ken ni Ombudsman Jesus Crispin Remulla, mabalin nga agbanag iti nadagsen a pannusa dagiti kastoy nga aramid, kasta payen ti napasamak ken ni dati a Bohol provincial board member Vierna Mae Boniel-Maglasang a naikkat iti serbisio ken tungpal-biag a na-disqualify iti pampubliko a posision.
Maibasar iti decision ti Ombudsman, napaneknekan a nagaramat ni Boniel-Maglasang iti 100 litro ti gasolina a nailatang para iti government vehicle kadagiti pribado a lugan idi 2024.
Impaganetget ni Remulla a saan a palabsen ti ahensia dagiti panagabuso iti government fuel, agraman ti panagaramat iti non-government vehicles ken panangpeke kadagiti resibo.
