Siguradoen ti Department of Energy (DOE) nga umanay ti suplay ti langis iti pagilian iti limapulo nga aldaw bayat a mayur-uray ti pannakasangpet ti nayon a buffer stocks ita a bulan.
Segun ken ni DOE Undersecretary Sandy Sales, 900,000 a barrels iti langis iti nakaituding a sumangpet ita a bulan.
Pakairamanan dayta iti imuna a 300,000barrels a manamnama a sumangpet sakbay iti April 10 a naggapu idiay Malaysia idinto a ti dua a shipment ti sumaruno a sumangpet manipod North Asia ken India.
Kinuna met ni Energy Secretary Sharon Garin a ti buffer stocks ket maal-ala iti salinong ti Emergency Energy Security Program ken adda umdas a panawen iti pagilian tapno manayunan ti suplay a kasapulan.
Maibasar iti listaan ti DOE, ti agdama a suplay ti gasolina, kruso ken dadduma pay a produkto petrolyo ket umabot iti 47 agingga nasurok sangapulo nga aldaw, depende iti klasena.
