VIGAN CITY – Kayat ti maysa nga Overseas Filipino Worker idiay Riyadh, Saudi Arabia a ni Mary Joy Espejo iti makaawid ditoy pagilian ta saannan a maibturan ti nalaus a panangparparigat kenkuana dagiti amona manipud idi napan iti nasao a lugar idi July 9.
Damo na laeng ni Espejo iti mapan idiay ballasiw taaw a ti kangrunaan a gagem na iti panagtrabaho na iti ballasiw taaw ket maikkan iti napintas a masakbayan iti pamilya na, nangruna dagiti annak na ngem saan na a ninamnama a maparigatan a perme gapu kadagiti nagbalin nga amo na.
Ti pannaki-uman ti Bombo Radyo Vigan ken ni Espejo, nadakamat na a di damo ket nasayaat pay laeng iti kasasaad na ngem saan a naited ti sueldona isu nga inreklamona iti ahensia ditoy pagilian nga insigida met a naaksyunan ti ahensia idiay Riyadh.
Ti ammo na, agtultuloyen a nasayaat iti kasasaad na ngem nagtultuloyen iti panagrigatna agsipud ta pagimunan isuna ti asawa ti amona, pagbagkatenda ti gasul ken pabasulenda a dinadael na iti bado ti amo na a lalaki.
Agsipud iti dayta, nagpaarayat iti agency na idiay Riyadh ket inpadas na iti simrek iti sabali nga amo ngem isu met latta nga isu iti pannakaparigat na agsipud ta tallo a kadsaaran a pagtaengan iti ayan ti amo na.
Nagpatulong ni Espejo iti agency na ditoy pagilian ngem kwinestyonaranda ti kalikagumna nga agawid ta kunada nga awan met iti parikut iti salun-atna kas nakailanad iti medical certificate-na isu nga awan ti rason a palubosanda nga agawid.
Irupir iti agency na idiay Riyadh a maisubli ni Espejo iti immuna nga amona ta kunada nga isudanton ti mangpaawid kenkuana ngem saan nga immannugot gapu iti butengna.
