Pinasingkedan ni Presidente Ferdinand Marcos Jr. a nakaipaayen ti Office of the President iti nasurok P200 milion para idiay Cebu ken dagiti ili nga inapektaran ti magnitude 6.9 a gingined.
Manipud iti nasao a gatad, P180 milion ti naited iti probinsia ken dagiti LGU, P20 milion iti ospital ti DOH, ken sag-P5 milion kadagiti ospital a patpatarayen ti LGU.
Mangipaay pay ti gobierno iti P10,000 cash assistance kadagiti pamilia a naawanan iti pagnaedan, ken naipasigurado ti agtultuloy a pannakaipaay ti taraon ken suplay ti danum.
Maipatakder ti ‘tent city’ idiay Bogo City babaen kadagiti tolda ti Red Cross idi pandemya, nga adda karamanna a pasilidad kas ti danum, koriente, ken taraon.
Ininspeksion pay ti presidente dagiti nadadael a pagtaengan, pagadalan, ken ospital ket inkarina ti rehabilitasion.
