Inkalintegan ti National Parent Teacher Association a saan a basul ti mangisursuro, kapulisan wenno pagadalan dagiti kinaranggas a mapaspasamak iti uneg ken aglawlaw ti pagadalan.
Kasaruno dayta ti napasamak a pammaltog iti San Jose National High School idiay Tacloban a nakatayan dagiti 3 nga estudiante.
Iti pannaki-uman ti Bombo Radyo Vigan ken ni Willy Rodriguez, NPTA President, dagiti kastoy a pasamak ket dagiti nagannak ti makitkitada nga adda pagkuranganda kadagiti anakda nga agbasbasa.
Kinuna a napateg a mabantayan dagiti nagannak ti ar-aramiden ken hilig dagiti anakda, agramanen ti aktibidadda iti social media.
Impaganetget ni Rodriguez a ti edukasion ket mangrugi iti uneg ti pagtaengan isu a patienna a napateg ti intervention dagiti nagannak.
Mamati pay ti nasao nga opisial a saan a bullying ti rason ti pasamak no di ket daytoy ket naplano ken impluwensia dagiti online gaming.
Kabayatanna, agtultuloy met a pappapigsaen ti NPTA ti pannakibinnuligda kadagiti nagannak, pagadalan, ken komunidad.
