Natalek ti National Food Authority a gumatangda iti ad-adu nga irik kadagiti lokal a mannalon ita a tawen kagiddan ti panangipangato ti gobierno iti buffer stock targetna manipud iti siam nga aldaw agingga sangapulo ket lima nga aldaw.
Segun iti NFA, ti buffer stock ket ti kabilegan a lebel ti imbentaryo ti bagas a nasken a mapagtalinaed iti aniaman nga oras tapno mausar kadagiti emergency ken tapno mapagtalinaed dagiti programa ti gobierno a pangtulong no adda didigra.
Natalek ni NFA Administrator Larry Lacson a magun-odda dagiti gagemda iti panaggatang iti intero a pagilian iti baet dagiti manamnama a karit kas ti panangiparuar kadagiti nagatang nga stock ti NFA rice, kapasidad ti bodega para iti ngimmato a buffer stock, ken ti naaprubaran a badyet iti salinong ti 2025 General Appropriations Act.
Para iti tawen 2024, kinuna ni Lacson a naala ti NFA ti 95 percent iti 300,000 metric tons target procurement da.
