Mapapati a nalimlimo ti maysa a negosiante mainaig iti pannakaala dagiti 20 nga urbon a baboy-na a saan a nabayadan idiay Barangay Bulag, ili ti Bantay.
Ti biktima ket agtawen iti uppat a pulo ket lima, tubo ti Brgy. Lydia, Marcos, Ilocos Norte ngem agnanaed idiay Barangay Bulag.
Dagiti suspek ket dua a lalaki nga agpada nga addan iti husto a tawen, residente idiay Barangay Sacuyya Norte, Santa, Ilocos Sur.
Ti biktima ken dagiti dua a caretaker ket personal a nagturong iti Bantay Municipal Police Station tapno ipakaammo ti mapapati a swindling incident.
Segun kadagiti nagreklamo, iti alas-tres ti malem idi Setyembre 20, 2026 ket napan ti maysa a suspek ken adda kaduana a tallo nga indibidwal tapno alen dagiti 20 nga urbon a baboy.
Iti dayta a gundaway, pinalubosan ti maysa a caretaker nga alaenda dagiti urbon a baboy gapu ta namati nga addan ti napagpatangan ti kadua na a caretaker ken iti maysa a suspek.
Dagus nga innala ti grupo dagiti baboy ket inkarga da iti dua a kurong-kurong, ngem kalpasanna, naammuan nga awan ti napasamak a panagpatang ti maysa a caretaker ken ti maysa a suspek.
Agpapan kadagituy, dagiti duapulo nga urbon a baboy ket aggatad ti P91, 800.
Mannarimaanen ti imbestigasion dagiti otoridad mainaig iti nadakamat nga insidente.
