Pinasingkedan ni National Bureau of Investigation (NBI) Director Melvin Matibag nga ipatungpal ti ahensya ti bilin ni Justice Secretary Fredderick Vida nga iserbu ti arrest warrant manipod International Criminal Court (ICC) kontra ken ni Senador Bato dela Rosa.
Segun ken ni Matibag, ti bilin ket kemmegen ni Senator Bato dela Rosa isu nga aramidenda dayta nga awan ti delayna ket nainget a surotenda iti pagannurotan tapno maaramidda iti propesyonal a wagas.
Impaganetgetna a kemmegenda ti pugante a ni dela Rosa, kayatna man wenno saan tapno maimplementar ti linteg nga awan ti pagbutngan ken kanunonganda.
Maipalagip a nagipila ni dela Rosa ti petisyon para iti Temporary Restraining Order (TRO) ken Status Quo Ante Order iti Korte Suprema tapno lapdan ti pannakaipatungpal ti ICC warrant iti Pilipinas, ngem imbasura ti Korte Suprema.
Siguradoen ni Matibag a makikamkammayet iti NBI iti fact-finding panel iti Department of Justice ken impaganetgetna ti kari ti ahensya iti maysa a transparent, napudno ken naurnos nga imbestigasyon.
