Nagpanawagan ni Senador Kiko Pangilinan iti ad-adu nga intervention manipud iti gobierno tapno masalwadan dagiti mannalon ken mangngalap kontra iti kumarkaro nga epekto ti panagpangina ti presio ti langis nga epekto ti krisis iti Middle East.
Segun ken ni Pangilinan, ti panagpangina ti global oil prices ket direkta a mangipangpangina iti gastos iti transportasion, abono, ken dadduma pay a napateg nga agricultural inputs nga ad-adda a mangparparigat kadagiti mannalon ken mangngalap.
Kunana nga agpegpeggad ti food security ti pagilian no agtultuloy nga agbalin a limitado ti suporta kadagitoy sektor.
Iti sektor ti panagkalap, umabot iti 400,000 laeng manipud iti 2.4 milion a mangngalap ti manamnama a makaawat iti tulong.
Malaksid dayta, mapatta-patta a 15,000 a mangngalap ti makaganar iti fuel assistance manipud iti limitado a pondo ti gobierno.
