Idurduron ni Parañaque 2nd District Rep. Brian Yamsuan ti gakat a mangpangato iti sueldo dagiti special needs education (SNed) teachers tapno matignayan ti pagkurangan dagiti mangisursuro para kadagiti agad-adal nga adda rangkapna.
Iti salinong ti House Bill 5574, maipangato manipod Salary Grade 14 agingga Grade 16 ti minimum salary grade iti SNed teachers kadagiti pampubliko a pagadalan.
Katukad dayta iti basic pay a P45,694 kada bulan ita a tawen ken P47,829 inton 2027.
Segun ken ni Yamsuan, kasapulan ti umdas a bilang ti SNed teachers tapno maikkan ti patas a gundaway iti edukasion dagiti agad-adal nga adda rangkapna.
Maibasar iti listaan, 391,089 learners with disabilities (LWDs) ti naka-enroll iti public schools idi school year 2024-2025 ngem awan pay iti 6,000 SNed teachers iti agserserbi kadakuada.
