Narekobre ti National Bureau of Investigation (NBI) ti natakaw a painting ni National Artist Fernando Amorsolo a “Mango Harvesters.”
Naipan ti 88-years old a painting iti National Museum ken naberipika nga authentic.
Natakaw ti painting iti museo idiay Silay, Negros Occidental idi Hulio 3.
Segun kenni NBI Director Jaime Santiago, dagus da nga inwayat ti entrapment operations kalpasan a naala da ti impormasyon nga adda aglaklako ti nasao a painting nga aggatad ti P3.5 million.
Naisayangkat ti operasyon idi Hulio 11 idiay Tomas Morato, Quezon City.
Basar iti report, inlemmeng ti maysa kadagiti suspek ti painting iti uneg ti bag, ken pimmanaw iti museo bayat a madama ti tour.
Nakemmeg dagiti nangpadas a mangilako iti painting a nabigbig da Ritz Chona Ching ken Donecio Somaylo.
Gapu dayta sumango dagiti suspek iti panaglabsing iti Anti-Fencing Law.
