Nasurok kumurang 200 a police personnel ti maideploy inton bigat idiay San Isidro, San Juan, Ilocos Sur nga isu ti pakaangayan ita a tawen ti Rambak Kristo Ari tapno mabantayan ti seguridad dagiti dumar-ay iti nasao a selebrasion.
Iti pannaki-uman ti Bombo Radyo Vigan ken ni Police Colonel Agosto Asuncion, Acting Police Provincial Director, kontentoda iti inda panagsagsagana para iti seguridad ti selebrasion agraman ti pannakaidatag ti traffic management.
Nagyaman ni Asuncion kadagiti timmulong kadakuada nangruna dagiti opisial ti barangay ken ti Local Government Unit iti ili ti San Juan tapno agbalin a natalged, nakappia ken naragsak ti daytoy a selebrasion ita a tawen.
Immunan a naisayangkat ti inspeksion kangrunaan kadagiti ruta tapno masigurado ti natalged nga idadalyasat dagiti lugan ken tapno naan-annayas ti taray ti trapiko kabayatan ti event.
Kabayatanna, alas dos inton bigat ti oras ti misa iti St. Isidore The Farmer Parish ngem adda ti naituding a programa iti alas dose iti aldaw.
