Pinasingkedan ti Commission on Elections nga umabot iti nasurok innem a gasut a ribo a deactivated voters ti nagapply para iti reactivation tapno makabotos para iti 2025 midterm elections.
Segun ken ni Comelec Spokesperson John Rex Laudiangco, namnamaenda nga ad-adu pay ti agapply kas baro a rehistrado a botante ken nangnangruna dagiti na-deactivate.
Ti deadline para iti online application iti reactivation ket nayatiddug agingga Setyembre 25, manipud iti dati a Setyembre 7.
Dagiti rason para iti delisting ket ti saan a panagbotos iti dua nga agsaruno kadagiti immuna a regular election, babaen iti bilin ti korte, pannakatay ken kaadda dagiti saan a husto a dokumento.
Nagpalagip met ti Comelec kadagiti deactivated voters nga agapply para iti reactivation a mabalinda nga aramiden online agingga adda kompleto a biometrics iti lokal nga opisina ti Comelec a nagparehistroanda.
