Nagsurat ti House Committee on Good Government and Public Accountability iti Philippine Statistics Authority (PSA) tapno maammuan no adda rekord dagiti 677 a nakalista a nakaawat iti confidential fund ni Vice President Sara Duterte.
Impatulod ni Manila 3rd District Rep. Joel Chua, chairman ti komite, kenni National Statistician Claire Dennis Mapa ti request kalpasan ti panangpaneknek ti PSA nga awan ti “Mary Grace Piattos” iti rekordda.
Maysa ni Piattos kadagiti mapapati a nakaawat iti confidential fund a maibasar kadagiti acknowledgment receipts (ARs) nga inpasa ti Department of Education iti Commission on Audit (COA).
Malaksid iti daytoy, kinuna met ni Assistant National Statistician Marizza Grande nga awan met ti rekord ti ahensia ti maysa a Kokoy Villamin.
Binabalaw dagiti agpapanday-linteg daytoy a nagan gapu ta adda iti AR ti DEPED ken OVP ngem, agduma ti surat ken pirmana.
Inyunay-unay ni Chua a no awan ni Piattos iti database ti PSA, ad-adda a kasapulan a maamuan no lehitimo dagiti 677 a nagan kadagiti AR.
