Umabot iti nasurok 5,300 a tattao pakairamanan dagiti Pilipino iti agtaltalinaed a nakabalud kadagiti online scam centers iti asideg ti border iti Myanmar ken Thailand iti baet ti kampania kontra human trafficking ken online fraud iti rehiyon.
Iti surat nga impatulod ti kapulisan iti Thailand, kinuna ti Civil Society Network for Human Trafficking Victim Assistance (CSNHTV) a kaaddoan dagiti biktima ket gangannaet nga agtaltalinaed a nakabalud iti sumagmamano a pasilidad kadagiti lugar a kontrolado ti maysa nga armado a grupo idiay Myanmar.
Mapapati a karaman kadagiti nakabalud ket naggapu idiay China, Thailand, Malaysia, Brazil, Kenya ken Pilipinas.
Segun ti United Nations, dagiti scam center iti sumagmamano a paset ti Southeast Asia pakairamanan ti Myanmar ken Cambodia ket karaman iti nakaru nga online fraud a makapaspastrek iti binilion a dolyar kada tawen.
Kaaddoan kadagiti agtrabtrabaho ket mapapati a nabiktima iti human trafficking.
