Nakaituding a mapan idiay Malaysia ti Gilas Pilipinas inton Nobiembre 21 para iti fifth window ti FIBA World Cup Asian Qualifiers.
Ti nasapa nga ipapan ti grupo ket tapno maikkan dalan ni coach Tim Cone ken ti national team ti agingga lima nga aldaw tapno maykabesa ti aglawlaw ti Seremban City kasta met ti court idiay Karisma Arena.
Manamnama pay nga agisayangkat ni Cone ti mini-camp idiay Malaysia tapno mapapigsa ti standing ti Gilas ken makastrek da iti World Cup idiay Doha, Qatar inton sumaruno a tawen.
Inton Nobiembre 22 met ket sumaruno idiay Malaysia ti sumagmamano nga overseas players kas da Dwight Ramos, AJ Edu, Kevin Quiambao ken posibilidad a maka-ayayam ni Kai Sotto.
Manamnama pay a sumangpet ken maka-ayayam ti baro a naturalized player ti pagilian a ni Bennie Boatwright.
