Umaboten iti nasurok tallo gasut a tattao ti nangipila iti aplikasyonda iti International Criminal Court tapno mabigbig a biktima iti drug war ni dati a Presidente Rodrigo Duterte.
Paset daytoy iti panagsagana sakbay ti naituding a confirmation of charges hearing inton Setyembre 23.
Segun iti ICC Registry, numan pay bassit daytoy a bilang no ikumparar iti kinaadu dagiti kayatna ti makipaset, nalawag nga adu a pamilia ti mawaw iti hustisia.
Nakita metten dagiti naipasa a dokumento kas ti barangay ken voter’s ID, agraman dagiti sinapataanda a salaysay tapno masigurado ti pakabigbigan dagiti aplikante.
Nakadepende itan iti ICC no bigbigenda amin ti aplikasyon kas paset iti kaso kontra ken ni Duterte a sumangsango iti kaso a crime against humanity ken naibalud ita idiay The Hague, Netherlands.
