Dinayaw ti Department of Information and Communications Technology (DICT) dagiti telecommunications company iti napaspas a panagsubli ti communication services kadagiti lugar a naapektaran ti napigsa a tudo gapu iti Habagat.
Segun ti DICT, napateg ti napaspas a pannakaisubli ti signal tapno masigurado ti agtultuloy a komunikasyon dagiti umili, kasaruno ti panawagan ni Pres. Ferdinand Marcos Jr. a pagtalinaeden a konektado ti publiko iti panawen ti didigra.
Kinuna pay ti DICT a naballigi ti koordinasyon iti salinong ti Digital Bayanihan, maysa nga inisyatiba iti gobierno ken pribado a sektor a gagem a mapagtalinaed ti connectivity ken maidanon ti napapateg a serbisio kadagiti Pilipino iti oras ti didigra.
Siguradoen ti ahensia nga agtultuloy iti pannakitinnulongda kadagiti telcos tapno mapagtalinaed a mapangnamnamaan ti communication services iti panawen ti didigra.
