Umabot iti 89.48 a tonelada a basura ti nakolekta iti Metropolitan Manila Development Authority (MMDA) kalpasan ti Piesta ni Jesus Nazareno idi Huebes.
Segun iti MMDA, dagiti basura ket manipud pay laeng idi January 6 agingga January 9, a katukad ti duapulo ket maysa a truckloads a basura.
Highlight iti Piesta ni Jesus Nazareno dagiti Novena masses, “Pahalik” wenno ti pannakasagid ti imahen, ken ti Traslacion, wenno ti prosesion ti imahen manipud Quirino Grandstand agingga iti Quiapo Church.
Ti Traslacion ita a tawen ket immatendaran iti nasurok a 8.12 a milion a deboto ni Jesus Nazareno, nga ad-adu ngem ti bilang dagiti nakipaset idi napan a tawen.
Immabot ti ruta ti Traslacion iti 5.8 a kilometro a limmabas iti tallo a plasa ken parke, maysa nga underpass, innem a rangtay, ken sangapulo ket walo a national ken city roads.
Nagpaut ti prosesion ita a tawen iti duapulo nga oras ken limapulo ket lima a minuto, nga isu ti kapautan sipud 2020.
