Immapela ti Malakanyang iti transport group a Manibela a pagpanunuton ken saan da nga ituloy ti transport strike inton Abril 15 agingga 17 gapu ta saan daytoy a makatulong iti agdama a kasasaad ti pagilian.
Segun ken ni Palace Press Officer Atty. Claire Castro, nakarkaro a mangpadagsen iti sitwasion ti panagsardeng a panag-pasada aglalo ta apektado ti intero a pagilian iti nangato a presio ti produkto petrolyo.
Pinasingkedan ni Castro nga imbes nga agisayangkat ti kilos protesta, ti kangrunaan a kasapulan ti pagilian iti agdama ket ti nasayaat a koordinasion iti nagbaetan ti gobierno ken dagiti tsuper.
Kagiddan daytoy, binabalaw ti Malakanyang ti pammabasol ti Manibela a nabuntog ti aksion ti administrasion ni Presidente Ferdinand Marcos Jr. iti panangrisut ti serye ti panagngato ti presio ti krudo.
