Nadundunor iti nadumaduma a paset iti bagi ti lalaki a nagmotorsiklo idinto a natukkol iti tulang iti akin-kannigid nga abaga ti maysa a menor de edad a nagbisikleta kalpasan iti panagdinnungparda iti provincial road idiay Barangay Poblacion, Sta. Catalina, Ilocos Sur itay alas nuebe dies iti bigat, September 22, 2024.
Nabigbig ti nagmaneho iti Mio Aerox BRW4 a ni Byron Rodillas Vicencio, agtawen iti uppat a pulo ket tallo, naasawaan, adda driver’s license na, nagaramat iti protective head gear nga agnaed idiay Barangay San Sebastian, San Vicente idinto a ti nagmaneho iti Mountain bicycle ket maysa nga agtawen iti sangapulo ket innem a taga-Poblacion, Sta. Catalina.
Iti pannaki-uman ti Bombo Radyo Vigan ken ni Police Executive Master Sergeant Florence Rapacon, agpapadaya a direksyon ti nagmotorsiklo idinto nga agpa-ammianan ti nakabisikleta idin nadanonda iti intersection ket isun iti panagdinnungparda.
Segun ken ni Rapacon, gapu iti pasamak ket nadunor ti nakamotorsiklo idinto a natukkol iti tulang iti akin-kannigid nga abaga ti menor de edad nga agpada a naipan iti St. James Hospital, Pantay Daya, Vigan City babaen kadagiti nagresponde a Rural Health Unit – Sta. Catalina.
Naamoan a saan met a nataray dagiti dua idi napasamak iti aksidente ngem gapu kadagiti nakaparking a luglugan iti sangwanan iti simbaan iti ili ket nalabit saan a nakita ti nakabisikleta ti sumungad a nakamotorsiklo a gappuanan iti aksidente.
Nupay kasta, nakapagsaritan dagiti pamilia dagiti dua a karaman iti aksidente para iti magastos iti ospital ken pannakasimpa dagiti luganda.
Kabayatanna, nagpalagip ni Rapacon kadagiti motorista iti panagan-annad a panagmaneho nangruna iti panagalibtak nu madanon iti intersection tapno saan a maaksidente.
VIDEO – PEMS FLORENCE RAPACON
