VIGAN CITY – Nagdinnungpar idiay national highway ti Puerta Real, Sto. Domingo ti Mitsubishi van a minaneho ni Johnny Tabania Baro, agtawen ti uppat a pulo ket pito, naasawaan ken agnaed idiay Barangay San Julian Sur, Vigan City ken Honda Civic a minaneho ni Jan Dominic Rosario Naval, agtawen ti dua pulo ket maysa, nurse ken agnaed ti Barangay Baclig, Cabugao.
Agpa-amyanan a direksyon ti Honda Civic idi dinungpar ti van a naggapu iti sabali a linya ngem awan ti nadunor iti napasamak nga aksidente.
Kabayatanna, awan iti nadunor iti aksidente met laeng a napasamak idiay Barangay Bacsil, San Juan idi bigat idi August 14.
Agpada nga agpa-amyanan a direksyon ti Toyota Innova a minaneho ni Roperto Amano nga agtawen ti tallo pulo ket maysa nga agnanaed idiay Don Lorenzo Querubin, Caoayan ken ti Honda CRV a minaneho ni Leo Gene Tanagon a taga- Batac City, Ilocos Norte.
Immun- una ti Innova idi nagsardeng gapu ta ti sarsarunwen na a lugan ket nagkarga iti pasahero.
Ti dayta a kanito, posible a saan a nasiputan ti CRV iti panagsardeng iti sar-sarunwen na nga Innova isu a natukbob na iti likudan a paset ti lugan.
