VIGAN CITY – Agpada a nadunor dagiti driver ti motorsiklo ken kurong-kurong iti aksidente a napasamak iti national highway idiay Barangay San Ramon, Magsingal, Ilocos Sur.
Ti nagmaneho ti Yamaha NMAX a metallic blue ket ni Onil John Visoria Prades, agtawen iti duapulo ket dua, baro nga agnaed idiay Nagsabaran, San Juan idinto a ti nagmaneho ti nangisit a Honda TMX 155 nga adda sidecar-na wenno kurong-kurong ket ni Alexander Bergonia Tolentino, agtawen iti uppat a pulo ket pito, naasawaan, barangay kagawad nga agnaed idiay San Clemente, Magsingal.
Iti pannaki-uman ti Bombo Radyo Vigan ken ni PMSG. Jojo Unciano manipod Magsingal Municipal Police Station, agpada nga agpamianan dagiti dua a lugan a ti akin-sango ket ti kurong-kurong ken sumarsaruno ti motorsiklo.
Segun ken ni Unciano, idi nadanona iti nasao a lugar ket aksidente a natukbob ti motorsiklo ti likodan a paset ti kurong-kurong a gappuanan ti pannakadunorda.
Nagsagaba ti fracture iti akin-kannigid nga abaga ti nagmaneho ti motorsiklo idinto a head injury met ti sinagaba ti driver ti kurong-kurong.
Agpadada a naipan iti Ilocos Sur District Hospital Magsingal babaen kadagiti nagresponde a PNP ken MHO personnel.
Nagpalagip ni Uniciano kadagiti motorista nga agbalin a defensive driver sadinoman iti ayanda tapno saanda a maisagmak.
VIDEO – PMSG. JOJO UNCIANO
