Nadunor dagiti nagkalubbon iti motorsiklo ken ti maysa a mangisursuro a nadungparda iti national highway ti Barangay Laslasong West, Sta. Maria, Ilocos Sur.
Ti Euro150 a motorsiklo ket minaneho ti agtawen iti duapulo ket pito, construction worker, taga-Bantay Abot, Narvacan, backrider-na ti agtawen iti duapulo ket uppat, construction worker a taga-Barangay Limmansangan, Narvacan.
Kabayatanna, ti met pedestrian ket maysa a mangisursuro nga agtawen iti duapulo ket tallo, tubo iti Manaoag, Pangasinan ngem aggigyan iti Barangay Laslasong West, Sta. Maria.
Magmagna a bumallasiw ti mangisursuro iti pedestrian lane ti national highway idin ta sumungad ti napaspas ti tarayna a motorsiklo nga aggapu iti abagatan.
Idi madanon ti motorsiklo ti kurbada a paset ti rangtay, pinadas ti drayber ti agbusina ngem nadungparna latta ket naguyas iti kalsada.
Agpada a nadunor dagiti karaman iti aksidente ken naipaagasda iti ospital para iti naan-anay a pannakatamingda.
Nakainom dagiti nagkalubbon idi mapasamak ti aksidente.
