Kiddaw ti pamilia iti mairamraman kas suspek iti napasamak a pammagkong iti siudad ti Vigan a lapdan ti panag-post ken panag-comment iti social media ti saan a beripikado nga impormasion.
Daytoy ket kasaruno a maitudtudo ken mairamraman ti maysa a tricycle driver a timmaray idi napasamak ti insidente kas maysa a suspek.
Iti pannakiuman ti Bombo Radyo Vigan ken ni Myleen Pisalbo, asawa ti tricycle driver a timmaray, nadagsen ti rikna ti pamilia da ti pannaka-post ti ladawan da iti asawa na a maipagarup a maibagbaga a maysa a suspek ti asawana iti insidente.
Pinasingkedan ni Pisalbo nga awan ti kina-agpayso iti naipablaak iti social media a karaman ti asawa na iti napasamak a pammagkong gapu ta kayat na laeng a mailiklik ti bagi-na ken saan a mairaman iti insidente isu a timmaray.
Iti agdama ket na-trauma payen ti tricycle driver gapu kadagiti pammabasol kontra kenkuana ket saan payen a maka-pasada iti buteng-na nga adda mapasamak kenkuana a saan a nasayaat.
Kabayatanna, kayat ti pamilia ti tricycle driver a mairamraman iti insidente a maikkat ti social media post, ken masapul nga ag-public apology iti nagipablaak.
Kalaksidan dayta, desidido ti pamilia nga agipila ti kaso gapu ta saan da a maaklon ti pannakadadael ti imahe da kadagiti tattao.
