VIGAN CITY – Inlawlawag ti Inter Agency Task Force on Emerging Infectious Disease no ania ti nagdumaan ti enhanced community quarantine ken ti general community quarantine iti publiko tapno maliklikan ti pannakaallilaw dagiti umili.
No enhanced community quarantine kas naipatungpal iti National Capital Region, Central Luzon, CALABARZON, ken dadduma pay a lugar a narisgo gapu iti COVID19 agingga May 15 ket saan pay a maipalubos ti public transportation, dagiti laeng napateg a negosyo ti agtuloy ti operasyonda ken kasapulan ti naan-anay nga assessment sakbay iti pannakaipatungpal ti general community quarantine.
Kabayatanna, no met general community quarantine nga isu ti maipatungpal inton May 1 kadagiti lugar a nababa iti risgo ti panagwaras ti COVID19 kas ditoy probinsia ket mapalubosan ti public transportation ngem malimitaran laeng ti mailugan a pasahero; limapulo agingga sangagasut a porsiento ti pannakapili dagiti malukatan nga establisimento.
