Isingsingasing da Senador Risa Hontiveros ken Senador JV Ejercito ti pannakaipasa ti Senate Bill No.2 wenno Masterplan on Infrastructure and National Development (MIND) Act nga aramiden a naur-urnos ken transparent ti panangipatungpal dagiti infrastructure projects.
Segun kenni Ejercito, makatulong ti singasing tapno mapadaras ti panagdur-as dagiti rehiyon, pannakapaadda ti ad-adu a trabaho, ken maliklikan ti iregularidad iti panangipatungpal dagiti infrastructure projects.
Gagem ti gakat a lapdan ti last-minute budget insertions ken maikkan dagiti lokal a gobierno nga agdesision dagiti priyoridad a proyekto iti lugar da.
Kabayatanna, pinasingkedan ni senador Hontiveros a napateg ti pannakapaadda ti maysa a komprehensibo a master plan tapno maliklikan dagiti saan a kasapulan, nangina ken kuwestionable a proyekto.
Innayon ni Hontiveros a no awan ti nalawa a plano, agbalin a nagulo ti panag-gastos ti pondo ti gobierno ken mabalin a saan a marisut dagiti husto a kasapulan ti komunidad.
