Insingasing ni Senador JV Ejercito ti kaadda ti blueprint wenno master plan nga agserbi a direksion ti Pilipinas iti sumaruno a 30 wenno 50 agingga iti 100 a tawen.
Segun kenni Ejercito, mabayag dagiti dadakkel a proyekto ti imprastruktura kas iti riles ken airport gapu ta agdalan pay laeng dagitoy iti panagadal, feasibility studies, panagplano ken panagbangon.
Inlawlawag pay ti senador ti sistema ti politika ken ti innem a tawen a termino ti presidente kas sumagmamano kadagiti rason no apay nga ad-adda a maipaayan ti atension dagiti programa iti ababa ken kalalainganna a panawen ngem kadagiti napaut a plano.
Impaganetgetna a rumbeng nga agtultuloy dagiti dadakkel a programa ti imprastruktura uray kalpasan ti panagbalbaliw ti administrasion, nupay mabalin nga addaan pay laeng ti tunggal baro a presidente kadagiti bukodna a prioridad ken proyekto.
