Isingsingsasing ni Senador JV Ejercito ti pannakaipangato ti Personnel Economic Relief Allowance dagiti kameng ti gobierno manipud iti P2,000 nga agbalin a P5,000 kada bulan iti salinong ti Senate Bill No. 2540 o “PERA Adjustment Act.”
Gagem ti gakat a maliklikan ti epekto ti agtultuloy a panagpangina ti presio dagiti kangrunaan a magatang ken serbisio iti nasurok tallo milion nga agserserbi iti pagilian.
Itudingna pay daytoy ti tinawen a pannakaisimpa ti allowance maibasar iti panagpangato ti inflation rate tapno mapagtalinaed ti kabaelan a gumatang dagiti benepisyaryo.
Sakup ti gakat dagiti kameng ti national ken local government, agraman dagiti mangisursuro, health worker, pulis, suldado ken dadduma pay a uniformed personnel, ngem saan kadagiti kameng iti sabali a pagilian nga umaw-awat iti overseas allowances.
