Nangipila ni Senior Deputy Majority Floor Leader JV Ejercito iti Senate Bill No. 2522 a ti gagemna ket madoble manipud iti P1,000 nga agbalin a P2,000 ti binulan a pension dagiti marigrigat a senior citizen.
Gagem ti gakat nga amyendaran ti Republic Act No. 11916 tapno masolusyonan ti panagpangina ti presio dagiti taraon, agas, serbisio a pang-salun-at, utilities, transportasion ken dadduma pay a kangrunaan a pagkasapulan.
Impaganetget ni Ejercito a saan a makanay ti agdama a P1,000 pension para iti kaadduan a senior ken nasken a makagiddan ti social protection system iti umad-adu a kasapulanda.
Iti salinong ti gakat, mapalawa ti depinision ti indigent senior citizen tapno mairaman dagiti awan a pension wenno permanente a pastrek ken dagiti umaw-awat iti pension wenno financial assistance a saan a lumabes iti P10,000 iti binulan.
