Nakemmeg ti maysa a menor-de-edad babaen iti naisayangkat a buy-bust operation gapu iti mapapati a panagaramat ken panagilakona ti marijuana ili ti Santa Catalina, Ilocos Sur.
Nabigbig ti suspek nga agtawen iti 17, estudiante, user ken buyer, ken agnaed iti nasao a lugar.
Iti pannaki-uman ti Bombo Radyo Vigan ken ni PCpt. Marlon Martinez, Office-in-Charge ti Santa Catalina Municipal Police Station (MPS), nakaawat ti opisinada ti impormasion maipanggep ti panangilako ti marijuana iti maysa a pagadalan.
Segun ken ni PCpt. Martinez, maysa nga estudiante ti nangipakaammo kadakuada nga adda ti aglaklako ti iligal a droga, ken isigida met a nangiwayat dagiti intel-da ti monitoring ken surveillance activities iti nasao a lugar.
Apaman a nakumpirmaran dagiti pannakabagi ti linteg nga husto ti naited kadakuada nga impormasion, nangisayangkatda metten ti buy-bust operation kadua ti Municipal Social Welfare and Development Office (MSWDO) – Santa Catalina, ken dagiti dadduma pay a pannakabagi ti linteg.
Mapatta-patta nga aggatad iti PhP1,000.00 ti mapapati a napagango a bulong ti marijuana ken nakumpiskar manipud iti suspek ti buy-bust money.
Adda itan ti suspek iti kustodia ti MSWDO – Santa Catalina para iti naan-anay a pannakadalanna ti husto a proseso. Augie Arellano
