Nagsagaba iti nakaro a dunor dagiti menor de edad a nagkalubbon iti motorsiklo iti napasamak nga aksidente iti national highway idiay Barangay Olo-Olo Sur, Santiago, Ilocos Sur.
Ti Euro 125 motorcycle ket minaneho ti babai nga agtawen iti sangapulo ket lima, Grade 8 student, kinalubbonna ti agtawen iti sangapulo ket pito, Grade 12 student, taga-Barangay Mambug, agpada nga awan ti suotda a helmet.
Ti met Toyota HiAce van ket minaneho ni Joseph Soriano Madalas, agtawen iti duapulo ket siam, Philippine Airforce personnel, taga-325, Don Mendoza Street, Espanya, Lingayen, Pangasinan, inluganna dagiti pito a Philippine Airforce personnel.
Karaman ti maysa a white sedan iti aksidente ngem saan pay nga ammo ti pakabigbigan ti drayber.
Iti pannaki-uman ti Bombo Radyo Vigan ken ni Police Captain Justine Jeff Aguigam, agpapa-amianan ti van ken sedan idin ta nag-overtake ti sedan iti maysa pay a lugan.
Gapu iti dayta, nasagidna ti motorsiklo ket napan daytoy iti bangir a linya nga isu met ti gundaway a pannakadungpar kadakuada ti sumungad a van.
Naipaagas dagiti nagkalubbon iti ospital para iti naan-anay a pannakatamingda idinto a saan a naan-ano ti drayber ken dagiti inlugan ti van.
Nakasagana met a tumulong ti drayber ti van iti magastos ti panagpaagas dagiti menor de edad.
