Balligi ti pannakaisayangkat ti Medical Mission iti salinong ti PuroKalusugan program idiay Barangay Sabuanan, babaen iti Sta. Lucia Local Government.
Ti aktibidad ket indaulwan ti Municipal Health Office, babaen iti pannakibinnuligda iti Department of Health – Ilocos CHD, Ilocos Sur District Hospital-Sta.Lucia, MSWDO- Sta Lucia ken ti Dr. Shiela Estrada- Granada Optical Clinic.
Iti pannaki-uman ti Bombo Radyo Vigan ken ni Mayor Joseph Simon Valdez, daytoy ti maysa kadagiti kasayaatan a programa ti il inga agpaay kadagiti agindeg isu a namnamaenda a tinawento a maisayangkat tapno maipangruna latta ti salun-atda.
Kabayatanna, 68 a pasyente ti naserbian iti medical consultation ken dimmalan iti Non-Communicable Disease (NCD) risk assessments.
Naipaay pay ti libre nga agas kadagiti amin a pasiente a daytoy ket inlatangan ti nasao a local government iti pondo.
47 met dagiti naka-avail iti laboratory services, agraman ti 43 glucose test, 25 a cholesterol test ken 47 a blood typing procedures.
Malaksid dayta, naipaay pay ti dental services kadagiti 10 nga indibidual ken eye checkup kadagiti 29 a benepisyaryo.
Iti agdama, ti Barangay Sabuanan ti maika-19 a barangay manipud iti 36 a barangay ti ili ti naserbianen iti nasao a programa.
Nagyaman met ni Barangay Captain Joe-An Antonio iti mayor ket ibilangna daytoy nga addang a dakkel a tulong nangruna no maipanggep iti salun-at dagiti kalugaranna.
