Agtultuloy iti imbestigasyon dagiti otoridad ti panagtakawan iti WPS Products Corporation Warehouse a masarakan iti uneg ti Vikings construction supplies idiay Sitio Lusod, Barangay Calaoa-an, Candon City idi kalman April 3, 2025.
Ti biktima ket ni Yumin Zeng, Chinese national nga agtawen iti duapulo ket siam, akinkukua iti WPS products Corporation ken agdama nga agnaed idiay Barangay Tablac, Candon City idinto a saan a nabigbig dagiti suspek.
Iti pannaki-uman ti Bombo Radyo Vigan ken ni PLt. Jovelyn Antalan manipod Candon City Police Station, apaman a nakasangpet ti biktima iti opisinana ket napasinna a ti yellow vault a naglaon kadagiti dokumento, black cellular phone nga aggatad iti P10,000 ken kuarta a P40,000 ket mapukpukaw.
Iti panagsukimat ti akin-kukua ket napansinna nga adda abot a nakali iti akin-daya a paset ti warehouse a patienna nga isu ti nagnaan a simrek ken pimmanaw dagiti suspek.
Maibasar iti CCTV footage iti uneg ti opisina, alas tres iti parbangon idi kalman ket dua a suspek iti simrek ti warehouse ket innalada dagiti nasao nga items.
Segun ken ni Antalan, patienda a planado ti pannakaisayangkat ti panagtakawan ta imposible a makali iti maysa la nga aldaw iti abot a nakitada isu a patienda a posible a dati wenno agdama nga empleado iti nangaramid iti panagtakawan.
Nupay kasta, saan a nabigbig dagiti suspek gapu iti inaramatda a narigat a pakabigbigan kadakuada ken awan pay ti CCTV iti ruar ti establishyimento a mabalin koma a nayon a makatulong ti imbestigasyon.
VIDEO – PLT. JOVELYN ANTALAN
