Saan pay laeng a mamati ti maysa a nagturpos iti College of Law iti University of Northern Philippines a nakapasa iti 2025 Bar Examination.
Iti pannaki-uman ti Bombo Radyo Vigan ken ni Atty. Dazia Joelle Guillermo Dayag, narigat a patien iti pannakapasana ta aminado a narigat iti nagbalin a journey-na manipod nangrugi iti law school agingga a rimmuaren iti resulta iti bar exam.
Segun ken ni Dayag, uray impadamagen dagiti kameng ti pamilia ken gagayyemna iti pannakapasana ket saanna pay a nakita iti naganna iti live iti supreme court isu nga inurayna a makitana sakbay a namati ket idi nakitana, napalaus iti ragsakna.
Kinunana nga aniaman iti agbalin a resulta iti exam ket saanna nga inlaksid nga amangan a saan a makapasa isu nga inkeddengna nga umadayo ket napan idiay Sagada tapno no kas bilang saan a makapasa ket saanna a makita dagiti tattao a maassian kenkuana ken maikkanna ti bagbagina a makapagpampanunot.
Impaayna iti Namarsua ti amin a talek ta patienna a no para kenka iti maysa a banag ket maipaay aniaman ti naglaslasatan.
Aminado a saan a consistent iti panagbasana ta adda maysa a subject iti nakabagsakanna isu nga inusarna a gameng tapno lalaingen pay ket nakasursurona nga awaten ken ipanakkel ta iti pannakapaayna ket isu iti nangted adal kenkuana.
Mensahena kadagiti saan a napagasatan nga agtalek latta iti Namarsua ta patienna a mas ay-ayaten ti Dios dagiti tattao a makarikrikna nga “unqualified”, agtalek iti sarita nga agbalinda amin nga attorney ngem addanto iti tiempoda.
Kabayatanna, nagayaman pay ni Atty. Dayag kadagiti amin a timmulong kenkuana nangruna iti partner-na a ni Jonathan Bilgera, kameng ti pamilia ken gagayyemna tapno maragpat iti arapaapna.
