Dead on arrival gapu iti pannaka-atakena ni Romel Domingo Palomares Sr., agtawen iti uppat a pulo ket innem, taga-Barangay Bungro, San Ildefonso, Ilocos Sur.
Nakaawat ti Santa Police Station iti report manipud iti maysa a concerned citizen a mangipakpakaammo nga adda lalaki a nakadasay iti national highway ti Imelda Park, Magsaysay District, Santa ket dagus met a tinurongda ti lugar.
Maibasar iti inisyal nga imbestigasyon, nakita ni Wilderic Domenden Tadena, agtawen iti uppat a pulo ket dua, taga-Taleb, Bantay ti biktima a sumangsang-at babaen iti bisikletana idin ta natalimudaw isu a sinardenganna.
Segun iti asawa ti biktima a ni Rosie Lucina Palomares, alas singko itay agsapa, nagpakada ti biktima a mapan agbisikleta idiay Sta. Maria ta adda mapanna bisitaen a gayyemna.
Alas syete bainte iti agsapa, nakadanon ti biktima iti pagtaengan ti gayyemna a ni Galileo Carido Concepcion III, agtawen iti limapulo ket walo, agnaed iti Poblacion, Sta. Maria ket pimmanaw met laeng iti alas otso iti agsapa.
Naideklarar a dead on arrival ti biktima iti alas nuebe singkwento iti agsapa babaen iti nangasikaso a doktorna.
Natakuatan a nagsagaba iti acute myocardial infarction wenno na-cardiac arrest ti biktima.
