Kontraen ni House Committee on Justice Chairperson ken Batangas Representative Gerville Luistro nga adda sukatna a pondo ti panangpaborda iti impeachment ni Vice President Sara Duterte.
Reaksion dayta ni Luistro iti panangibaga ni Navotas City Rep. Toby Tiangco a nasken a bantayan ti “for later release” project gapu ta mabalin a maaramat daytoy tapno guyugoyen dagiti kongresista nga agbotos pabor iti impeachment ni Duterte.
Segun ken ni Luistro, awan ti ammona nga adda sukat ti desisionda iti impeachment complaint kontra iti bise presidente ken awan ti gandat ti liderato ti kamara tapno maimpluwensiaan isuna kas mangidaulo ti House Justice Panel.
Impaganetget ti kongresista a ti ania man nga addang iti impeachment proceedings ket paset iti panangipatungpalda iti mandato ti konstitusion.
