Adda manen baro a nagan malaksid kenni ‘Mary Grace Piattos’ ti rimmuar kadagiti acknowledgment receipts iti liquidation report ti confidential fund nga us-usaren ti Office of the Vice President ken DEPED a binabalaw dagiti agpapanday-linteg.
Agduadua dagiti agpapanday-linteg iti dua a tao nga addaan iti agpada a nagan a “Kokoy Villamin” a nagpirma kadagiti acknowledgment receipts (AR) ti Office of the Vice President (OVP) ken Department of Education (DepEd).
Segun kenni Lanao del Sur 1st District Rep. Zia Alonto Adiong, nakitana ti dua nga AR nga agpada ti naganna ngem agduma ti pirmada.
Kinuna ni Adiong a “highly unlikely” wenno imposible ti kaadda ti dua a tao nga agpada ti nagan ken pirma iti nagduma a departamento.
Kabayatanna, immanamong ni COA Intelligence and Confidential Funds Auditor Gloria Camora a ti pasamak ket “highly unlikely”.
Mamati ni Adiong a dagiti mapagduaduaan nga AR ket mangipakita iti panangabuso iti proseso ti panag-audit.
