Binigbig ni Ronald Alejo, Head ti Filipino Department ti Ilocos Sur National High School ti dakkel nga akem ti pagsasao iti inaldaw a biag ti tunggal umili kagiddan ti panangrambak ita a bulan ti Agosto iti Buwan ng Wikang Pambansa.
Iti pannaki-uman ti Bombo Radyo Vigan ken ni Alejo, ti pagsasao ti namagkaysa kadagiti Pilipino idi nagkauna a panawen.
Innayonna a napateg a rambakan ti Buwan ng Wika kas pananglagip iti kinapateg ti pagsasao nangruna kadagiti estudiante a maibilang ita a Gen Z ta no dadduma ket malipatanda ti napintas a maited ti pagsasasao wenno wika.
Iti agdama, agtultuloy ti panangplanoda kadagiti aktibidad nga isayangkatda kas iti Sabayang Pagbigkas ken Quiz Bee a mabalin a sumalian dagiti agad-adal.
Para ken ni Alejo, ti pagsasao ti pagsarmingan ti kultura ti Pilipino ken rangtay iti panagkaykaysa dagiti kaputotan.
